அத்தனை எளிதாக இருப்பதில்லை..

*
அத்தனை எளிதாக இருந்துவிடவில்லை
கைக்குழந்தையின்
உள்ளங்கை ரேகை வரிகளை
கவிதைக்கென சுவீகரிப்பது

அத்தனை எளிதாக இருந்துவிடவில்லை

ஒரு
புன்னகையின் அளவுகோளை
விஸ்தரித்து எல்லைக் கிழிப்பது

அத்தனை எளிதாக இருந்துவிடவில்லை

எதிர்பார்க்கும் துரோகத்தின்
தீர்மானங்களை அனுமானித்து வெளியிடுவது

அத்தனை எளிதாக இருந்துவிடவில்லை

இருமுனை ஒப்பந்த மீறலில்
சந்தர்ப்பங்கள் நீர்த்துப் போவது

அத்தனை எளிதாக இருந்துவிடவில்லை

ரகசியங்கள் உச்சரிக்கப்பட்ட
உதடுகளின் மந்திரத்தில்
மௌனங்கள் எரிவது

அத்தனை எளிதாக இருப்பதில்லை

என்னிலிருந்து நானைக் கடத்தி
உன்னிடம் ஒப்படைப்பது..

****

அங்கெல்லாம் காத்திருப்பதாக..

*
எங்கெல்லாம்
மரண வாடை சுமந்து
மௌன நதி ஓடுகிறதோ..

அங்கெல்லாம்
கால் நனைக்கிறது..

காத்திருப்பதாக
பாசாங்கு செய்யும்
வார்த்தைக் கொக்கு..!

****

மெட்ரோ கவிதைகள் - 79

*
ஒவ்வொரு மதியமும்
லஞ்ச் டேபிளில்
திறக்கப்படும்
டிபன் பாக்ஸ்களில்..

நகரத்தின்
காலை நேர அவசரங்களை
பெரும்பாலும்
சலிப்போடு
அடைத்துத் தருகிறார்கள்..

மனைவி
அம்மா
தங்கை
மகள்
மருமகள்
பாட்டி

அல்லது

ஒரு
தாதி..

****

தவறுதலாய்க் கைப்பட்டு நொறுங்கும் உண்மைகள்..

*
அதி இறுக்கமான
ஓர் உரையாடலை என் கையில்
திணித்துச் செல்கிறாய்..

அதிலிருந்து
உன் மௌனங்களைப் பிழிந்தெடுப்பது
சுலபமாய் இருக்கவில்லை..

தவறுதலாய்க் கைப்பட்டு நொறுங்கும்
உண்மைகளின் சில்லுகளில்
மினுக்குகிறது
சொல்ல மறந்த பொய்கள் மொத்தமும்

நீ
இங்கு வரவேண்டும்..

மீண்டுமொரு நட்சத்திர இரவில்
மற்றுமொரு பாசாங்கை
இருவரும்
ஒத்திகைப் பார்த்துவிடலாம்..

****

மொழியின் வனத்தில்..

*
மொழியின் வனத்தில்
மட்கிய
விதையென

ஒரு
பெருமழைக்கு
காத்திருக்கிறது

இன்னும்
சரியாக உச்சரிக்கப்படாத
தமிழ்..!

****

காதல் வெளிகளின் புதைந்த தண்டவாளங்கள்..

*
உத்தரவாதங்களோடு
கடக்க நேரும்
காதல் வெளிகளின்

புதைந்த
தண்டவாளங்களில்
தடதடத்து ஓடுகிறது

பரிச்சயமில்லா தருணங்கள்..!

****

வேட்டைக் களைப்பில்..

*
ஓட்டுக் கூரையின்
இடுக்கில்
முளைத்துவிட்ட
கொத்துச் செடி நிழலில்..

தூங்குகிறது..

வேட்டைக் களைப்பில்
ஒரு
பூனை..!

****

லயப் பிசகு..

*
பெயர் அறிமுகங்களில்
இழைய முயலுகிறது
ஒரு
இசை நுட்பம்..

தொடரும்
லயப் பிசகில்..

எட்ட முடியாமல் போய்விடுகிறது
அதன்
உச்ச ஸ்தாயி..!

****

நீ - நம் மற்றும் நாம்..

*
நீ
என்னருகில்
நின்று கொண்டு திட்டமிடுகிறாய்..

எனக்கெதிரான
தீர்மானங்களை..

அது -

கச்சிதமாகவே இருக்கிறது..

****

மெட்ரோ கவிதைகள் - 78

*
பரஸ்பரம் கை குலுக்கி
புன்னகை வியர்க்கும் சங்கடங்களை

நுழைவாயில் மிதியடியில்
அழுந்தத் தேய்த்து
விடைபெறும்
சாமர்த்தியத்தை

சில
அவமானங்களுக்கு பிறகு
கற்றுத் தந்து விடுகிறது
நகரத்து
யதார்த்தங்கள்..!

****