மெட்ரோ கவிதைகள் - 89

*
எவ்வளவு தீனி
எவ்வளவு தீனி

பயணிகளை மேயும்
ஷேர் ஆட்டோக்கள்

உறுமலோடு
உறுமலோடு

உறுமிக் கொண்டே எவ்வளவு
தீனி

நெருங்கி நெருங்கி நெருக்கியே
அருகில்
நுகரும்
மஞ்சள் மிருகங்கள்..

****

மெட்ரோ கவிதைகள் - 88

*
நாளொன்றுக்கு
பதினெட்டு சிக்னல்கள்

கிடைக்கும்
மிகு சொற்ப நொடிகளில்
ஹெல்மட்டின் கருநீல நிற வைஸரில் மோதும்
டிஜிட்டல் கோடுகளுக்கிடையில்

அவசரமாகவேனும்
எழுதிவிட முடிவதில்

சம்பவங்களைத் தருணங்களை
ஒளிர்கிறது

சிவப்பும்
பச்சையுமான
விளக்குகள்

****

மெட்ரோ கவிதைகள் - 87

*
அண்ணாந்து வாய் பார்க்கும்
குரங்குக் குட்டி
தாளமடிப்பவனின்
சேஷ்டைகளை
பசியோடு பட்டியலிடுகிறது

தலையில் தட்டை ஏந்தி
சலாம் வைத்து
கூட்டத்தை வலம் வந்து
சிதறும் காசுப் பொறுக்கி இளிக்கிறது..
நகரம் புரியாமல்

***

மெட்ரோ கவிதைகள் - 86

*
' ஏன்யா சாவுற காலத்துல
எங்க உயிரை வந்து வாங்குறீங்க..
எனக்கு என்ன எட்டு கையா இருக்கு?
லைன்ல வாய்யா பெருசு.. ' -

ஒவ்வொரு மாதமும்
ஒரு
அரசு வங்கியில்
பென்ஷனுக்காக முண்டும்
முதியவர்கள்
போர்க்கால பதட்டத்தோடு
எதிர்கொள்கிறார்கள்
தங்கள் சொற்ப தொகையை..

Customer is our first person - என்றபடி
வரிசையின் கடைசியில்
தொங்கிக் கொண்டிருக்கிறார்
நிரந்தரமாய்
ஒருவர்

****

மெட்ரோ கவிதைகள் - 85

*
முதலில்
டிபன் கடை என்றார்கள்
பிறகு
ஹோட்டல் என்றார்கள்
பிறகு
ரெஸ்டாரன்ட் என்றார்கள்
பிறகு
Cuisine என்றார்கள்
பிறகு
கேட்டரிங் என்றார்கள்
பிறகு
பஃபே என்றார்கள்
இப்போது
பாஸ்ட் புட் என்கிறார்கள்
மீண்டும்
டிபன் கடை என்பார்கள்

முதலில் இருந்து
நடுவிலும்
பிறகு மீண்டும்

இனியும் கூட...

எல்லா இடத்திலும்..

பசிக்காக
கையேந்தும் மனிதன்
நிற்கிறான்

****

மெட்ரோ கவிதைகள் - 84

*
பால் பாக்கெட் வாங்க
நடை தளர்ந்து
கடை நோக்கி நகரும்
வயதான
ஒரு மனிதன்

தொலைதூர அலுவலுக்காக
அதிகாலை பஸ் பிடிக்க
வேகமாக விரையும்
ஒரு இளம்பெண்

பெயர் மறந்து
முகவரி மறந்து
அனைத்தும் மறந்து
பிளாட்பார்மில் தூங்கிக் கொண்டிருக்கும்
ஒரு குடும்பம்

முன்னறிவிப்பின்றி
திடீரென்று பெய்து விடும்
ஒரு பெருமழையில்

நகரத்தின் அனைத்தும்
இயல்பு தப்புகிறது
அவசரமாய்

****

மெட்ரோ கவிதைகள் - 83

*
உச்சி வெயில் உருகும்
தார்ச்சாலையில்
புதைந்து கிடக்கிறது
ஒரு
சிறுமியின்
சிகப்பு நிற ஹேர்-கிளிப்

வெட்டுப்பட்ட
நெடுஞ்சாலை மரமொன்றின்
கிளையில் சிக்கி
படபடத்தபடி காத்திருக்கிறது
காற்றாடி
யாரோ ஒரு சிறுவனுக்காக

புத்தக மூட்டையோடு
அவசரமாய் சிக்னல் கடக்கும்
சிறுவர்களை
அச்சமூட்டுகிறது
மூன்று வட்ட வர்ணங்களும்
வித விதமான ஹாரன்களும்..

****

மெட்ரோ கவிதைகள் - 82

*
நகரத்தின் கொடும்பகலும்
கீழ்மை நிழலும் கவிய
வாசல் வரை
செருப்போடு வருகிறது
எல்லாமும்

****

மெட்ரோ கவிதைகள் - 81

*
மெட்ரோ ரயிலின் தள்ளாட்டத்தில்
பதற்றமுற்று வழியும்
அந்தப் பார்வையில்
வறுமை யாசிக்கிறது
பசிக்குரிய
மூலப்பொருளை

மாதக் கடைசியை
எதிர்கொள்ளும் திராணியற்ற
நடுத்தரங்கள்
முகத்தைத் திருப்பிக் கொள்கிறது
அவசரமாய்..!

****

மெட்ரோ கவிதைகள் - 80

*
ஜன்னலோரம்
காற்றைக் கிழித்து எதிரில் கடக்கும்
மெட்ரோ ரயிலின்
ஹாரன் சப்தத்தில்..

நீ
அனுப்பிய
காதல் மெஸேஜ்
உடைந்து கிடக்கிறது

இந்த
கம்பார்ட்மென்ட்டில்..!

****

மெட்ரோ கவிதைகள் - 79

*
ஒவ்வொரு மதியமும்
லஞ்ச் டேபிளில்
திறக்கப்படும்
டிபன் பாக்ஸ்களில்..

நகரத்தின்
காலை நேர அவசரங்களை
பெரும்பாலும்
சலிப்போடு
அடைத்துத் தருகிறார்கள்..

மனைவி
அம்மா
தங்கை
மகள்
மருமகள்
பாட்டி

அல்லது

ஒரு
தாதி..

****

மெட்ரோ கவிதைகள் - 78

*
பரஸ்பரம் கை குலுக்கி
புன்னகை வியர்க்கும் சங்கடங்களை

நுழைவாயில் மிதியடியில்
அழுந்தத் தேய்த்து
விடைபெறும்
சாமர்த்தியத்தை

சில
அவமானங்களுக்கு பிறகு
கற்றுத் தந்து விடுகிறது
நகரத்து
யதார்த்தங்கள்..!

****

மெட்ரோ கவிதைகள் - 77

*
இஸ்திரிப் பெட்டிக்குள்
கனலும்
கரியின் தீக்கங்கு..

கால் உதறி நிற்கும்
காலை நேர அவசரங்களைப்
பொசுக்கி நீவுகிறது..

உஸ்சென்ற சப்தத்தோடு நழுவி..
துண்டுக் கல்லொன்றில்
உட்கார்ந்தபடி..!

****

மெட்ரோ கவிதைகள் - 76

*
எதிர்மாடிக் கட்டிடட வேலைக்கு
கொட்டி வைத்திருக்கும்
பக்கத்து மணல் ஒதுக்கை நோக்கி..

எங்கிருந்தோ
வெவ்வேறு திசையிலிருந்து
கிளம்பி வருகின்றன பின்னிரவில்..
இரண்டு பசுக்கள்..

சிநேக அசைப் போடுதலில்
உருகி ஓடுகிறது
மஞ்சள் நிற சோடிய விளக்கொளி

விடியலில் சுரக்கும் பால்
டீக்கடை எவர்சில்வர் பாத்திரத்தில்
கொதித்து ஆவியாவதில்..
வெண்ணிறமாய்
சுழன்றெழும் பெருமூச்சுக்கள்..!

****

மெட்ரோ கவிதைகள் - 75

*
சமூகக் காகிதத்தில்
வறுமையின்
விழுமியங்களை..

புள்ளியிட்டு வரையும் கோடுகள்
ஏறி இறங்குவதில்..

ஓவியமாகிறது
ஒரு
நகரம்..!

***

மெட்ரோ கவிதைகள் - 74

*
நகரத்தின்
வெறிச்சோடும் பகலை
எதிர்கொள்ளும்
சாமர்த்திய நிழல்கள்..

சொற்ப
மரக் குடைகளின்
காலருகே காத்திருக்கின்றன..!

****

மெட்ரோ கவிதைகள் - 73

*
கான்க்ரீட் கட்டிடத்தின்
பக்கவாட்டில் தொங்கும்
கேபிள் வயரில்..

மழைத் தூறல் சேகரமாகி
துளித் துளியாய்
சரிந்திறங்குவதில்
உருண்டு வழியும்
வானில்..

நீல நிறமில்லை..!

****

மெட்ரோ கவிதைகள் - 72

*
பள்ளிக்கூட
நுழைவாயிலில் நின்றபடி
கண்ணீர் மல்க..

சொல்லுவதற்கோ
வேண்டுகோள் வைக்கவோ
வார்த்தைகள் இருந்தும்..

உதடு மடித்து
அழுகையைக் கட்டுப்படுத்தி..

கையசைத்து
' டாட்டா ' சொல்லி..

மெதுவாய் திரும்பி நடக்கிறான்
மகன்..

எனக்கும்
அவனுக்குமான விடுமுறையை
விழுங்கி ஏப்பம் விட்டு..

வாய்ப் பிளந்து காத்திருக்கிறது
கல்வி என்னும்
துருப்பிடித்த கதவு..!

****

மெட்ரோ கவிதைகள் - 71

*
பிளாட்பாரத்தில்
யாருமற்றுக் காத்திருக்கும்
குடி நீர் கேனின்
கழுத்து வளைவை..

சுற்றி சுற்றி வருகிறது
ஒரு கட்டெறும்பு..

நீரின் மீது நடக்க முடிந்த
அதிசயத்தையும்
அதைப் பருகி தாகம் தீர்ப்பதற்கான
வாசலைத் தேடும்
ஆயாசத்தையும்..

ஏகக் கணத்தில் எதிர்க் கொள்கிறது

வெயில் காயும்
இந்த நகரத்தின்

நடுப் பகல்..!

****

மெட்ரோ கவிதைகள் - 67

*
தெரு முக்கு இட்லி கடையருகே
பற்களை இழந்த
கிழவன் ஒருவனின்
தாடை அசைவில்..

நரைத்து விட்ட வருடங்கள்
கறுத்த கன்னங்களின் குழிக்குள்
இருள் பள்ளம் போல
அமிழ்ந்து மீள்கின்றன
நொடிக்கொரு முறை..

அருகே..

அடித்தண்டு வீங்கிப் பழுத்து
மேடு இறக்கங்களோடு
உயர்ந்து நிற்கும்
அரச மர இலைகள்..

காற்றில் ஒருசேர அசைந்து
முணுமுணுக்கின்றன..

காலத்தின் சலசலப்பை..!

****