புதிய கட்டளைகளின் பட்டியல்..

*
ஒரு வரையறை வைத்துக்கொள்ள முடியவில்லை
உனது எல்லை எதுவென்ற வரைபடத்தை
எனது அறைச் சுவரில் ஒட்டி வைக்கிறாய்

நினைவுப் படுத்திக்கொள்ளவோ அல்லது
ஞாபகத்தில் இருத்திக்கொள்ளவோ
புதிய கட்டளைகளின் பட்டியலொன்றை
வாசலில் நின்றபடி சத்தமிட்டு வாசித்துச் செல்கிறாய்

படித்துக் கொண்டிருந்த புத்தகத்தை மூடி வைத்துவிட்டு
நானும்
பின்னிக் கொண்டிருந்த வலையை நிறுத்திவிட்டு
சிலந்தியும்
வாய்மூடி கேட்டுக் கொண்டிருக்கிறோம்

****

நன்றி : ' திண்ணை ' இணைய இதழ் ( ஜூன் - 10 - 2012 )

http://puthu.thinnai.com/?p=12129

உட்சுவரின் மௌன நிழல்..

*
இரவின் துளி ஈரம்
பரவும் இவ்வறையெங்கும்

கணுக்கால் தொட்டு நீளும் யாமத்தின்
முதல் கீற்றை ஒற்றியெடுக்கும்  உதடுகள்
உச்சரிக்க மறுக்கின்றன

முந்தையப் பகலை அதன் கானலை

நினைவில் மிதக்கும் முகங்களின்
நெளியுணர்ச்சிகள்  குமிழ் விட்டு வெடிக்கிறது
மொழியற்ற மொழியொன்றின் ஆழத்தில்

கூரையின் உட்சுவர் சுமக்கிறது
கரிய நிழலின் மௌனத்தை

****

நன்றி : ' திண்ணை ' இணைய இதழ் ( மே - 27 - 2012 )

http://puthu.thinnai.com/?p=11647 

நழுவும் உலகின் பிம்பம்

*
வெகு நேரமாய் தலையசைத்துக் கொண்டிருந்த
பூவில் எறும்பொன்று நடுங்குகிறது வீசும் காற்று புரியாமல்
கைவிரித்துத் தாங்கிப் படர்ந்த பச்சைக் காம்பில்
சிலிர்ப்போடுகிறது உச்சி நிழல்

பிறகு
தூறலோடு தொடங்கிய சிறு மழை
உருட்டுகிறது துளிகளை

அதில் நழுவும் உலகின் பிம்பம்
எறும்பின் உடலை வளைத்து
கீழிறக்குகிறது
மணலில் நெளியும் புழுவைக் கடந்து
வெயில் காயும் மேட்டின் துளைக்குள் நுழைய

பேச்சற்று சொற்ப வெளிச்சக் கீற்றோடு
மௌனமாய் அசைகிறது வனம்

****

நன்றி : ' திண்ணை ' இணைய இதழ் ( ஜனவரி - 22 - 2012 )

http://puthu.thinnai.com/?p=8006

மரணத்தை ஏந்திச் செல்லும் கால்கள்..

*
சலுகையோடு நீட்டப்படும்

கரங்கள் 

பெற்றுக் கொள்கின்றன 

ஒரு கருணையை 

மரணத்தை ஏந்திச் செல்லும் 

கால்கள் 

அடையத் துடிக்கின்றன 

இறுதி தரிசனத்தை 

இருப்புக்கும் இன்மைக்குமான 

பெருவழியில் 

சுவடுகளாகிறது

திரும்புதலின் பாதையும் 

காத்திருந்து எரியும் தெருவிளக்கும் 

***** 

நன்றி : ' திண்ணை ' இணைய இதழ் ( ஆகஸ்ட் - 28 - 2011 )

சின்னஞ்சிறிய இலைகள்..

*
பிளவுண்ட கரிய அலகில்
இரைப் பற்றுதல்
துள்ளத் துடிக்க இறுக்குகிறது
உயிரை

உயிர் வடிவம்
கனமெனவோ கனமற்றோ
அசைகிறது
பசியின் வயிற்றில்

மரக்கிளையில் துடிக்கும்
சின்னஞ்சிறிய இலைகள்
மெல்ல மெல்ல இழக்கின்றன
தம் நிறத்தை..

*****

நன்றி : ' திண்ணை ' இணைய இதழ் ( ஆகஸ்ட் - 21 - 2001 )

வாக்குறுதியின் நகல்..

*
ஒரு
வாக்குறுதியின் நகல்
தன்னகத்தே எழுதிப் போகும்
சொற்களின்
இடைவெளிகளில் உழுகிறது பார்வைகளை

அவைச் சொல்லத் தப்பிய தருணங்களை
நீட்டும் உள்ளங்கைககள்
ஏந்திப் பெற விரும்புவது

ஒரு சின்னஞ்சிறிய
அறிமுகத்தை
மட்டுமே

*****

நன்றி : ' திண்ணை ' இணைய இதழ் ( ஆகஸ்ட் - 14 - 2011 )

அதிர்ஷ்ட மீன்

*
ஆறடி நீளம்
இரண்டடி அகல கடலுக்குள்
கட்டைவிரல் அளவில் நீந்தத் தொடங்கிய
மீனுக்கு
தனக்கெனத் தூவப்படும் பிரத்யேக
உணவு உருண்டைகளின் மீது பூசிக்
கிடக்கும் அதிர்ஷ்டங்கள் புரிவதில்லை

நீள் பாதை நோக்கி மட்டுமே
சப்பையாய் வளர முடிந்ததில்
ஏற்பட்ட மன அழுத்தத்தைப் போக்க

மாதம் இரண்டு முறை வந்து போகும்
மன அழுத்த டாக்டர்
நிவாரணி ஊற்றிச் செல்கிறார்

அம்மீனுக்குத் தெரியவில்லை

தன்னால் ஒரு டாக்டர் உருவாகியிருப்பதும்
தன் மன அழுத்தத்தால்
அந்த டாக்டரின் மன அழுத்தம் கொஞ்சம்
நீங்கும் என்றும்

அடுத்த முறை வரும் டாக்டரிடம்
நிச்சயம் கேட்க வேண்டும்
' இந்தக் கடலை மீறி வளர
நான் என்ன செய்ய வேண்டும்..?'

****** 

நன்றி : ' திண்ணை ' இணைய இதழ் ( ஆகஸ்ட் - 7 - 2011 )

செதில்களின் பெருமூச்சு..

* 
பிடித்து உலுக்கும் கனவின் திரையில்
அசைகிறது உன் நிழல்

நீயுன் தூண்டில் வீசிக் காத்திருக்கிறாய்
என் உரையாடலின் உள்ளர்த்தம்
சிக்குவதற்கு

மரப்பலகைகள் வேய்ந்த பாதையில்
ஈரம் மின்னும் அந்தியின் இளமஞ்சள் நிறம்
இந்த அறையெங்கும் பரவிய
ரகசியத்தின் சங்கேதக் குறிப்புகளை
தேடிச் சலிக்கிறேன்

மூழ்குகிறது அகாலம்..

சின்னஞ்சிறிய நோக்கும் கூர்மையில்
கசியும் கானல் குட்டையில்
நீந்துகிறது நமது கண்கள்

யாவுமே செதில்களின் பெருமூச்சென
எழுதித் தருகிறாய்
இந்த மௌன இரவில்..

*****

நன்றி : ' திண்ணை ' இணைய இதழ் ( ஆகஸ்ட் - 1 - 2011 )

பயணத்தின் மஞ்சள் நிறம்..

*
மதிய வெயில் கோடுகளாய்
குறுக்கே விழுந்திருந்த
ஒரு
நடைப்பாதைப் பொழுது

பயணத்தின் மஞ்சளை
கரு நிழல் துரத்துவதை
எண்ணியிராத 
ஓர் எறும்பு

மரணத்தின் வடிவத்தை
வாசித்துக் கொண்டிருந்த அரைக் கணத்தில்
பட்டென்று ஸ்தம்பித்தது
கால் கட்டை விரலுக்குக் கீழ்

*****

நன்றி : ' திண்ணை ' இணைய இதழ் ( ஜூலை - 24 - 2011 )

மீளா நிழல்

* 
கைப்பிசைந்து நிம்மதியிழக்க நேர்கிறது
இப்பெரு அமைதியில்

காலடி ஓசைகளின் அதிர்வில்
நடுங்குகிறது நிற்கும் நிழல்

ஒளி கசியும் ஜன்னல் திரையில்
மடிந்து மடிந்து தொங்குகிறது
மீளா துக்கம்

கையெழுத்து இடச் சொன்ன படிவத்தில்
உறுதி செய்து கேட்கிறார்கள்
அவன் மரணத்தை

வெண்துணி போர்த்திய உடலென
வருகிறான் பின் எப்போதும் பார்க்க விரும்பாத
விழிகள் நிலைக் குத்த..

*****

நன்றி : ' திண்ணை ' இணைய இதழ் ( ஜூலை - 24 - 2011 )

முடிச்சிட்டுக் கொள்ளும் நாளங்கள்..

*
ஒரு கறுமைப் பொழுதை
ஊற்றிக் கொண்டிருக்கிறேன்
இரவின் குடுவையில்

வெளிச்சத் திரள் என
சிந்துகிறாய்
துயரத்தின் வாசலில்

கைப்பிடியளவு இதயத்தில்
அழுத்தும் நினைவு நாளங்களில்
முடிச்சிட்டுக் கொள்கிறது

எப்போதும்
முடிவற்று விரியும்
கோரிக்கை யாவும்

****

நன்றி : ' திண்ணை ' இணைய இதழ் ( ஜூலை - 10 - 2011 )

மரணித்தல் வரம்

*
கை நீளுதலை யாசகம் என்கிறாய்
யாசித்து பெறுவதாக இருப்பதில்லை
எனக்கு தேவையான பார்வை

பேசாதிருத்தல் அமைதி என்கிறாய்
பேசி அடைவதாக இருந்ததில்லை
நான் பெற்ற மௌனம்

மரணித்தல் வரம் என்பாய்
எதன் பொருட்டு தவம் இருந்தேனோ
அதிலில்லை
யாசகமோ
ஒரு மௌனமோ
குறைந்தபட்சம் ஒரு பார்வையோ

*****

நன்றி : ' திண்ணை ' இணைய இதழ் ( ஜூலை - 3 - 2011 )

சலனப் பாசியின் பசலை..

*

மரண மீன்

செதிலசைத்து நீந்துகிறது

நாளங்களில்

 

மூச்சுக் குமிழ் வீங்கும் நொடியில்

உடைந்து வாலசைக்கிறது

இதயம் நோக்கி

 

மௌன நீர்மையில்

வேர்ப்  பிடித்து முளைக்கும் சலனப் பாசி

நெளிந்து நெளிந்து கலக்கும் பசலையைத்  

தின்று தீர்க்க

 

வாய் திறந்து திறந்து மூடுகிறது

உயிரின்

நித்திரைத் திரட்டுகள்..

 

***** 

நன்றி : ' திண்ணை ' இணைய இதழ் ( ஜூன் - 25 - 2011 )

ஒற்றை எழுத்து

*
நீ
அறுதியிட்டு உச்சரித்த
ஒற்றை எழுத்தில்
ரத்தம் கசிகிறது
குத்திக் கிழித்த காயத்தின்
வலியென
இந்த அவமானம்..

*****

நன்றி : ' திண்ணை ' இணைய இதழ் ( ஜூன் - 19 - 2011 )

உறைந்திடும் துளி ரத்தம்..

*
உன்
துயரத்தின் சாயலை
நகலெடுத்துக் கொள்ளும்படி
உத்தரவிடுகிறாய்

பிடி நழுவும் குறுவாளின்
கூர் முனையில்
உறைந்திடும் துளி ரத்தம்..

ஊடுருவி மீண்ட
துரோகக் கணத்தின் சாட்சியென
துருப்பிடித்துக் காத்திருக்கிறது

உன் 
வரவுக்காக

*******

நன்றி : ' திண்ணை ' இணைய இதழ் ( ஜூன் - 5 - 2011 )

ரகசிய இருப்பிடங்களின் உற்பத்தி..

*
நகரின் மௌனம்
தன் அடர்ந்த செதில்கள் ஊடே
இடையறாது சுவாசிக்கிறது
இரவுகளை

அது
துணுக்கு விளக்கொளிகளில்
கரைகிறது
அழுக்கின் கசடென

எளிதில் கடந்துவிட முடியாத
தருணங்களை
உற்பத்தி செய்கிற ரகசிய இருப்பிடமாய்
மாற்றிக் கொள்கிறது

தன் மீது ஊர்ந்து
கூடடையும்
நகர மனிதர்களின்
மௌனங்களை

*****

நன்றி : ' திண்ணை ' இணைய இதழ் ( மே - 2 - 2011 )

மீன்பிடி கொக்குகள்..

*
வார்த்தைகளின்
வேலிப் படலைத் திறந்து வைத்திருக்கிறேன்
என் மனவெளியை
சூறையாடிக் கொள்

நேற்றிரவு உரையாடலின்
குளம்
இன்னும்
தளும்பிக் கொண்டிருக்கிறது

அதில்
உன் மௌனக் கொக்கு
ஒற்றைக் காலில்

நி
ற்
கி
ற
து..

நீ
சுருள் பிரிக்கும்
உன் கைத் தூண்டில் முனையில்
ஒரு எழுத்து நெளிகிறதே

மீன் பிடிக்கவா..?

தூ..!

கொக்கை விரட்டு
கொக்கை விரட்டு..

*******

நன்றி : ' திண்ணை ' இணைய இதழ் ( மே - 30 - 2011 )

கை விடப்பட்ட திசைகள்..

*

நீங்கள்

அப்படி ஒப்புக் கொள்ளும்போதே

கொஞ்சம் மரணிக்கிறீர்கள்..

 

ஆட்படும் கண நேர

தலையசைப்பில் நீர்த்துப் போகிறது

இருப்பதாக நம்பப்படும் வைராக்கியம்.

 

தேங்கியக் குட்டைக்குள்ளிருந்து

நீந்திப் பழகிய வார்த்தைகள்

ஒவ்வொன்றும் சிறகுகள் முளைத்து

கூரைக்கு மேலே பறத்தலை நிகழ்த்துகின்றன..

 

ரகசியமென இரவுகளில் கவிழ்கின்றது

முன்னெப்போதும் இளமையென

கை  விடப்பட்ட சந்தர்ப்பங்கள்..

 

*****

 

நன்றி : ' திண்ணை ' இணைய இதழ் ( மே - 21 -  2011 )

காற்று உடைக்கும் விசும்பல் மூச்சு..

*
துர்மரணத்தின் பின் கதவு
ரகசியமாகத் தட்டப்படுகிறது

அது மரத்தாலானது
அதன் கெட்டித்துப் போன கடைசலில்
செதில்கள் சொரசொரத்துவிட்டன

தன்
மென் தட்டலில்
ஓசையெதுவும் கடத்துமெண்ணம்
ஏதுமில்லை

காற்று உடைக்கும் சிறிய இடுக்கில்
கசியும் ஒலியை
விசும்பல் மூச்சென
அர்த்தப்படுத்துக் கொள்ளும்

கனவு

துயரத்தின் மொழிபெயர்ப்பை
விடியலில் அடுக்கி வைக்கிறது
எழுது மேஜையில்..

******

நன்றி : ' திண்ணை ' இணைய இதழ் ( ஏப்ரல் - 25 - 2011 )

இருப்பின் நிலம்..

*
ஒரு
வேர்க்கடலையைப் போல்
தோற்றம் கொண்ட
இந்த தனிமையை
உடைக்கிறேன்..

அதனுள்
இரண்டு மௌன விதைகள்
உருள்கின்றது

என்
இருப்பின் நிலமெங்கும்
கட்டுக்கடங்காத
உன் வேர்கள்..

*****

நன்றி : ' திண்ணை ' இணைய இதழ் ( ஏப்ரல் - 18 - 2011 )