விலகி வருடும் விலாவின் மந்திரமாகக் கசியும் காதல் மொழி

*
இத்தனை வாஞ்சை வேண்டாம்

கழுத்தருகே வீசும் உனது வெப்பப் பெருமூச்சு
ஆலிங்கனப் பற்றுதலோடு எழுதுகிற விரல் நுனியில் வியர்வை நழுவி
முதுகெலும்பு மேடுகளில் வளைந்து விலகி வருடும் விலாவில்
எழுப்பிவிடக்கூடும் இன்னொரு ஏவாளை
 
பங்கிட்டுக்கொள்ளும் வசதியில்லா படுக்கையில்
பாம்புகளுக்கு இடமில்லை
 
வம்ச விதையில் வளரும் அபத்தமாகிடலாம்
ஆப்பிள்
 
மனனம் செய்யும் மந்திரமாகக் கசியும் உனது காதல் மொழி
காமம் பிறழ உச்சரிக்க நேரும் ஆகம வசனத்தில்
வரவழைத்துவிடுவாய் சாத்தானை
 
தொடை மீறி பெருகும் உதிரச் சுழியில் சுழன்று மேலெழும்
உனது விஸ்வரூபத்தில்
விழி செருகி நீட்டும் கரம் பற்றி உள்ளிழுக்கிறாய்
 
போட்டுடைக்க தோதாக திறந்திருக்கும் ஜன்னல் சட்டகத்தில்
சிசுவின் பீங்கான் சிற்பத்தை நிறுத்தி வைத்து
முத்தமிட அழைக்கிறாய்
 
இத்தனை வாஞ்சை வேண்டாம்
வரவழைத்துவிடுவாய் என் சாத்தானை
******
 
நன்றி :  யாவரும்.காம் இணைய இதழ் [- 31 டிசம்பர் 2014]

புல்லட் ரயில் மீது எனக்கு நம்பிக்கை இல்லை

*
என்னைப் பொருத்திப் பார்க்க முனையாதே

நான்கு டயர்களில் உள்ள நட்டுகளை மரை கழற்று
இரண்டு வார்த்தைகளுக்கு மேல் நிற்க முடிவதில்லை

 

ஓடிப்போவது பற்றி பேசத்தானே கூப்பிட்டாய்
திசையைப் பற்றி விளக்கிச் சொல்

 

நட்சத்திரம் துணை வரவேண்டும்
புல்லட் ரயில் மீது நம்பிக்கை இல்லை

 

என்னைப் பொருத்திப்பார்க்க முனையாதே
கார் பாணட்டுக்குள் ஒளிந்துகொள்ளும் விருப்பம் இல்லை

 

பேசாமல்      
நடந்தே வேறு தேசம் போய்விட்டால் என்ன

மரை கழன்ற நட்டுகள் குறித்து கவலை கொள்கிறாயா
ஏன்

*****
 

நன்றி :  யாவரும்.காம் இணைய இதழ் [ - 31 டிசம்பர் 2014]

பாதையற்ற புறவாசலின் சுற்றுச்சுவர்

*
தொலைந்து போவதற்குரிய பாதையொன்று
மனத்தின் புறவாசலில் கிளை பிரிவதாக நியூரான் பின்னுகிற செய்தி
மீள் சூட்சும எழுத்தின் கோடுகளில்
அதன் நெருக்கக் கணங்களை ஸ்கேனர் சிகப்பொளியின்
இடவல ஓட்டமாக்கி அரூபக் குறிப்பெழுதுகிறது

கவனத்தில் கொள்ளத்தக்க காரண அடுக்குகளின்
புழுதிச் சிதறலில்
முளைவிடுவதாக இல்லை திரும்புதலுக்கான வரைப்படம்

யந்திர கூட்டிணைவின் இயக்க முரண்களை முடுக்கும்
பஸ்ஸர் ஒலி
துரத்துகிறது அவ்விடத்தின் வெளியை வெற்றாக்கிட

பாதையற்ற புறவாசலின்
சுற்றுச்சுவரில்
வேர்ச் சுற்றி வளர்கின்றன உலோக வரைப்படங்கள்

****


நன்றி : ' யாவரும்.காம் ' இணைய இதழ் [ ஜூலை - 19 - 2014 ]

http://www.yaavarum.com/archives/2614

சொல் மீது பரவும் சத்தியத்தின் ரத்தக் கசிவு

*
இயந்திரத்தைப் புரிந்து கொள்வதோடு
தொடர் இயக்க முறைமைகளின் ஏற்ற இறக்கமாகிறது
மொழி நெறி அடையாளமென குறுகும் அர்த்தங்களின் தோற்றம்
கட்டுமான அடுக்கங்களின் நெடிதுயரும் படி வழியே
அழைத்துப் போகும் ரகசிய புன்னகை

சொல் மீது பரவும் சத்தியத்தின் ரத்தக் கசிவை அடைத்துவிட
பயன்படுவதாக நீட்டப்படும் துருவேறிய ஆணி
கோளாறுகளை சரி செய்துவிடும் உத்தி கொண்டிருப்பது
செய் நேர்த்தியின் மீள் மௌனம்
உள்வயக் கொடூரங்களை முடுக்குதல்களின் குறிப்புகள் அடங்கிய
பக்கங்கள் வீசுகிற நீச நெடி

கையகப்படுத்திட நிந்திக்கும் நவீனப் போர்க்கள கேடயங்கள் தருவித்து
தற்காத்துக்கொள்ள கற்றுத் தரும் வாழ்வின் பொத்தல்களில்
பொருந்தும்படி இயங்கும் இயந்திர சொற்கள்
மேலும் இரைச்சலாய் வளர்கின்றன
நகரத்தைத் தின்றபடி

*****

நன்றி : ' யாவ ரும்.காம் ' இணைய இதழ் [ ஜூலை - 19 - 2014 ]

http://www.yaavarum.com/archives/2614

குளிர்ந்த உடலைக் கடந்து வெப்பத் தீவை அடைதல்

*
தாவரப் பச்சமை சுழிக்கிறது காதல் முத்தமொன்றின் கசந்த உதடுகளின் ஊடே
மலர்களைக் கனவு காண்பதாக புரளும் வேர்களின் ஈரக் கசிவை
இமை தாழ்ந்து மீளும்போது காண முடிந்தது

நறுமணம் நுகர்தல் பிழை என்பாய்

புலன்களின் காதுகளை அடைத்தபடி கேட்கப் பழகிய முனகல் இசை
இரவின் மீது படர்ந்தபடி பசலை வளர்க்கிறது

குளிர்ந்த உடலைக் கடந்துவிட அணைத்துக்கொள்
வெப்பத் தீவை அடையும்வரை படகைச் செலுத்து

படபடக்கும் பாய்மரத்தின் துடிப்பில் கனிகள் காய்க்கின்றன

புசிக்கத் தீண்டும் நாவில் பதியனிட்ட சொற்கள் சுரக்கும் பாலில்
சுவை கூட்டுகிறது முத்தத் திரவத்தின் ஊற்றைப் பிளந்து
கூரையை வெறித்து ஒரு மயக்கம்

அழுந்த பிதுங்கி கிளைப் பரத்தும் விரல்களில் வரைகிறாய்
வேறோர் உலகின் கதவை

*****

நன்றி : ' யாவரும்.காம் ' இணைய இதழ் [ ஜூலை - 19 - 2014 ]

http://www.yaavarum.com/archives/2614

கருவளையத்தை விட்டு கீழிறங்கித் திறந்து கொள்ளும் இரவு

*
சென்று அடைகிற காயங்களை சுவாசிக்கும் முன்
காத்திருக்கும்படி வந்து சேர்ந்த உத்தரவு அழைப்பை கையில் வைத்திருக்கிறாள்

மனத்தில் இருத்துவதற்குரிய ரகசியங்கள் யாவும் தீர்ந்துவிட்டதை
கடந்துவிட்ட பகல் சாட்சியம் சொல்வதாக ஒப்புக் கொண்டுவிட்டது

அதன் வெப்பச் சூடு கண்களின் கருவளையத்தில் சற்றேனும்
ஓய்ந்து தூங்கட்டும்
என விட்டு வைத்திருக்கிறாள்

சாபத்தின் சிறகுகளில் ஒட்டடை படிந்திருக்கிறது
முக்காலத்தை வலைப்பின்னும் சொற்களின் எட்டுக்கால்களும்
வலுவேறிவிட்டதாக நம்பத் தொடங்கிவிட்டாள்

அறையின் கிழக்கு மூலையில் இரவு திறந்து கொள்கிறது

படியேறி வரும் காலடிச் சத்தங்கள்
இழந்துவிடக்கூடாத நிதானத்தின் கடைசிப் பக்கத்தை
ஒரே ஒரு முறை நினைவுப்படுத்துகிறது

கருவளையத்தை விட்டு கீழிறங்கும் சொற்கள்
சாபத்தின் சர்ப்பப் பறவை பிளந்த நாவிலிருந்து
கொடிய நஞ்சின் இரண்டொரு சொட்டுகளை இரவல் பெற்று
அவள் கையில் திணிக்கிறது

அது ஒரு ஞாபகமூட்டல்
அது ஒரு பரிந்துரை
அது ஒரு போர்த் தந்திரமும் கூட

*****

நன்றி : ' யாவரும்.காம் ' இணைய இதழ் [ ஜூலை - 19 - 2014 ]

http://www.yaavarum.com/archives/2614

நெஞ்சு அதிர இறைஞ்சும் மன்றாடலின் முகடு

*
வன்மம் கொப்புளித்து வெடிக்கும் குருதி சூட்டில்
மனத்தின் மூர்க்கம் பூசிக்கொள்ளும் முகத்து தசைகள்
கோணுகின்றன

கைப்பற்றி முறுக்கிட தீரும் அவஸ்தையின் சொற்கள் கூட்டம்
வெளியேறுகிறது ஒற்றை அசௌகரியத்தை
முற்றிலும் நொறுக்கி

நெஞ்சு அதிர இறைஞ்சும் மன்றாடலின் முகட்டிலிருந்து
நழுவி வீழ்கிறது ஒப்பந்த வாக்குறுதிகள்
குற்றஞ்சாட்டி அடையாளங்காண பயணப்படும் பாதங்களை
கொடிச்சுற்றிக்கொள்ள பிரயத்தனமாகிறது
தனிமையொன்றின் அகாலம்

நீர்மைப் பொழுதுகளை மௌனக்கோப்பை தளும்ப
ஊற்றி பரிமாறுகிறேன் யாருமற்ற மேஜையின் விளிம்பில்

'சியர்ஸ்' சொல்லும் ரகசிய குரல் ஒன்று
இருள் மூடிய சூழல் பாதையின் அடர்த்தியிலிருந்து கசிகிறது
என்னை நோக்கி

எட்டிப் பிடிக்கும் ஆவலற்று வெறுமனே காயும் பகல் வெப்பம் குறித்து
கனவு காண்கிறேன்
காணுதலுக்கும் அடைதலுக்குமான கால வித்தியாசத்தில்
சுண்டிவிடப்படும் தருணங்களை
எனக்கென உயர்த்திய கோப்பைக்குள் ஊற்றுகிறேன்

அனுபவம் கிறங்கி உரைத்த வெயிலை மீண்டும்
பருகிட பரிந்துரைக்கிறீர்கள்

வன்மம் கொப்புளித்து வெடிக்கும் குருதி சூட்டை
அறை கூரைக்குள்
வரைந்து வைத்திருக்கிறேன்

நெஞ்சதிர இறைஞ்சிய மன்றாடலின் அசௌகரியத்தைப் பற்றி
விவாதிக்கும் மாலை நேரம்
அத்தனை வெதுவெதுப்பாய் இனங்கண்டு கொள்கிறது

மனத்தின் மூர்க்கத்தை
முகத்து தசைகளின் கோணல்களை
செத்துவிட்ட ஒரு ப்ரியத்தை

****

நன்றி : ' யாவரும்.காம் ' இணைய இதழ் [ ஜூலை - 19 - 2014 ]

http://www.yaavarum.com/archives/2614

நிச்சலனம் சுழித்தோடும் யாமம்

*
அதீத அந்தரங்கத்தோடு கமழ்கிறது பின்னங்கழுத்தில் பதிந்த முத்தம்
கைவளையில் நெருடும் விரல் நுனி
மணிக்கட்டு நரம்பின் மீது ஊர்ந்தபடி ஆரம் கூட்டுகிறது

காது மடல் உரசும் காற்றின் மூச்சில் சிறகு வளர்கிறது
யாமத்தின் அடர்ந்த இருளை ஏடிழைப் பிரித்து வெளிச்சமூட்டும் சிணுங்கல்

கோத்ததில் நெளியும் ஆலிலைப் பரல்களை அசைக்கிறது இதழ்
வெப்பம் வளரும் மச்சத்தை நெகிழ்த்தும் இந்நொடி
பூ மடல் உதிர அணைக்கும் நெருக்கத்தை வார்ப்பதில் வளையும் புன்னகை

கரைந்து போதல்
கலந்து கரைதல்

சுவாசச் சுடர் தூண்டி அசையும் நிச்சலனக் காமம்
பார்வை வனமேகி முயங்கும் உயிர்ப்பறவை தீண்டும் அலகில் காதல்

பத்து விரல் பற்றி நெஞ்சிறுகப் பதியும் நெற்றிப்பிறை
இடவலம் நகரும் சுட்டியில் ஆடும் முத்தம்

நீ மௌனம்
நீ நதி
நீ சங்கு
நீ பிறவி
ஊழிப் பிரளயப் பெருக்கில் சுழித்தோடும் இக்கூடல்
பாதக் கோலம் துளிர்த்து கரையேறி கட்டில் மேல் உயரும் நாணல்

சகி
ப்ரிய சகி
துடிப்படங்கும் அனல்மூச்சு அள்ளித் திருகி தைக்கும் தேகம்
இக்கடல் நுரைத்து முகில் உரிக்கும் உன் வைகறை

நான் பட்சி - என் சிறகு
படபடத்து இசை ஊதி இருள் புலர மீள் கவ்வும் அதே காமம்

*****

நன்றி : ' யாவரும்.காம் ' இணைய இதழ் [ மார்ச் - 10 - 2014 ]

http://www.yaavarum.com/archives/2228 

மூன்று டபிள்யூக்களுக்கு பிறகான ஒற்றைப் புள்ளி

*
நெருக்கியடுக்கப்பட்ட தோற்றப் பிழை கூடி
பட்டாணி உருண்டைகள் குவிந்த நெகிழி குடுவையின் மீது
நகரும் காலை நிழல்
வளி மண்டலம் உறிஞ்சிய காற்றில்லா நகர்வு நிகர் கல்லொன்றின்
பறவைக் கண் இமை அசைவு

எறும்பொன்றின் குச்சிக்கால் முனை வரையும் கோடுகள்
இட்டுச் செல்லும் தூசுப் படலத்தோடு
மேசை மீது எண்ணற்ற கேலக்ஸிகள்

வெப்பம் அனற்றும் அலமாரி கண்ணாடிக் கதவுகளை
மோதுகிறது அபத்த பிம்பம்
நானில்லை என்றொரு சிதறலை
வரிசைப் பிறழ்ந்த புத்தக வர்ணங்களை மொய்க்கும்
கொசுக்களின் ரீங்காரச் சிறகுகளில் மின்னுகிறது
சொற்களின் வெளிச்சம்

அறைக் கூரையிலிருந்து வழிந்திறங்கும் பொழுதுகளின் இழைப் பற்றி
தொங்குகிறது மௌனச் சிலந்தி

கணினித் திரையில் தட்டச்சப்படும் மூன்று டபிள்யூக்களுக்கு பிறகான
ஒற்றைப் புள்ளியில் எச்சமிடுகிறது வளிமண்டலம் நினைவுகூட்டி
துப்பும் புதிய கிரகம்

புற ஊதாக் கதிர்களின் வடிகட்டியில் மீந்த படிமங்களை கொண்டு
வலைப் பின்னுகிற எட்டுக்கால்களின் நூல்களையும்
இயக்கம் கொண்டசைகிறது
தப்பிதங்கள் நிறைந்த உலகின் பொம்மலாட்டம்

*****

நன்றி : ' யாவரும்.காம் ' இணைய இதழ் [ மார்ச் - 10 - 2014 ]

http://www.yaavarum.com/archives/2228 

ஒப்பந்த வசவுகளின் மரச் செதில்

*
பொய்யின் நிறம் பகிர்தலுக்கான வாசனையோடு இல்லை
இலக்கு தவறும் உண்மையொன்றின் பாதாளம்
பாதங்களின் விளிம்பில் அசைந்து
கடக்க வேண்டிய தொலைவுகளுக்கு கைகாட்டி உதிர்கிறது திசை

வார்த்தைகள் அயர்ந்து மணக்கும் பொழுதுகளை
நகர்த்துகிறது திரைச்சீலை
சரியென்றும் சரியில்லையென்பதுமான அபிப்பிராயங்கள்
புரட்டப்படும் சப்தத்தில் அதிர்கிறது முகம்

முன் - பின் தீர்மானங்களை இழுத்து வரும் வசவுகளோடு
ஒப்பந்தமாகும் மௌனத்தை ரத்து செய்யும்படி
நிர்ப்பந்திக்கும் வாக்குறுதிக்குள்
நிறம் நிறமாய் வாசனையை அவிழ்க்கிறது
நாளைய பொய்யாகும் திசைக்காட்டி மரமொன்றின் செதில்

****

நன்றி : ' யாவரும்.காம் ' இணைய இதழ் [ மார்ச் - 10 - 2014 ]

http://www.yaavarum.com/archives/2228 

வனமழிந்து அழுகும் ஆப்பிள் மரங்கள்

*
கானல் தகிக்கும் தார் ரோட்டின்
கருஞ் ஜல்லியை
உருக்கி எரியும் சிக்னல்

கையேந்தி நகரும் ரேகை நதியில்
மிதக்கிறது உச்சிப்பகல்

ஹாரன்கள் அலறும் நகரத்தின் விலாவில்
பசியோடு புரண்டுத் திரும்புகிறாள்
செம்பட்டை ஏவாள்

வனமழிந்து அழுகிய ஆப்பிள் மரத்தைத் துருப்பிடித்து
மெலிந்து தகிக்கும்
உருவகக் கம்பத்தின் தலையில்
கூடு கட்டி முட்டையிடுகிறான் ஆதாம்

பாவச் சம்பளத்தை ரகசியமாய் புரட்டிப் பழகிய
சர்ப்பத்தின் பிளந்த நாவிடுக்கில்
உலோக விசில் சத்தம்

****


நன்றி : ' யாவரும்.காம் ' இணைய இதழ் [ மார்ச் - 10 - 2014 ]

http://www.yaavarum.com/archives/2228

உரசிக்கொண்டு பற்றியெரியும் உரையாடலின் சாம்பல்..

*
அயற்சியோடு நடக்க வைத்துவிட்டாய்
தீர்மானங்கள் பலிப்பதில்லை
தனிமைப் பயணத்தில் அதுவொரு சுமை
திரும்பிப் பார்க்கத் தூண்டுவதாய் இல்லை உன் குரல்

நிறைய வாசித்தாயிற்று
நிறைய களைப்புறச் செய்துவிட்டன உன் வரிகள்
பிதற்றலும் கதறலுமாய் அலறும் பைத்தியக் கணங்களோடு
நிழல் வலை வீசுகிறாய்
சிறு விரலசைவில் அவை அறுகின்றன

என்னை எட்டிப்பிடிக்க துரத்தும் உன் காலடியோசை
வேறொரு கிரகத்திலிருந்து கேட்டுக்கொண்டே இருக்கிறது

எதை நம்புகிறாய்
உனது பிரத்யேக ஒற்றை விண் கல்லையா

கோடி நட்சத்திரங்களை வாரி இறைக்காமல்
கனக்கும் என் பையோடு
மேலும் நடந்தபடியே இருக்கிறேன் தீர்வதாயில்லை இந்த அயற்சி

காற்றில் வீசியெறிந்த
உன் சமரச வெண் துணியொன்று பற்றியெரிந்து சாம்பலாகிறது
உரசிக்கொண்ட உரையாடலின் பொறிப் பட்டு

உணர்கொம்பில் சுழல்கிறது ஊழிக்காற்றைப் பொருத்தும் மூச்சு
உறுதியான கால்கள் கொண்டிருக்கிறேன்
இறுகும் தசை சபிக்கிறது

முன்பு குடித்த தேநீரின் கசப்பை இன்றையத் தொண்டைக்குழி
திரளச் செய்கிறது
வெட்டியெடுக்காத பெருமலையை

அடுத்தடுத்து அமையவேண்டாம் மேலும் மேலும் ஓர் அண்மை
நடக்க நடக்க ஓயாத அயற்சி
தன் பகலை
சட்டென்று அணைத்துவிட்டது

பெருகும் திசையற்ற இந்த இருள் பிடித்திருக்கிறது

உன் சொற்கூச்சலை வேடிக்கைப் பார்க்கச் சொல்லி
இரண்டு காதுகளையும் அறுத்து வைக்கிறேன்
வான்கோவின் கத்திக்கொண்டு

நெருங்கும்போது அதை எடுத்துக்கொள்

*****

நன்றி : ' யாவரும். காம் ' இணைய இதழ் [ டிசம்பர் - 21 - 2013 ]

http://www.yaavarum.com/archives/1758

கனவின் முதுகில் மகரந்தம் தூவும் பட்டாம்பூச்சி..

*
என் நிலத்தில் நடும் துயரத்தில் பறக்காத
தனிமை நீ

மணிக்கட்டு நரம்பூடே ரத்தத்தில் நகரும் நினைவும்
மௌனத்தைச் சொல்ல விடாமல் தவிக்கச் செய்யும் நாக்குழைவுமாய்
உன் பிரியத்தைக் கோர்த்து வைத்திருக்கும் கோப்புகளைத் திறந்து வை
அதன் அடுக்குகளில்
பறவையின் சிறகாகப் படிந்திருக்கும் நம்
முத்தங்களைப் பிரித்தெடு

கொஞ்சநேரம் நம் வனத்தின் இருளில் பறக்க விரும்புகிறேன்
எனக்கு உதவி செய்

நீயென் இராப் புதிரின் ஊற்றுக்கண்
உன்னைப் பருகத் துடிக்கும் உதடுகள் வேறொரு செடியில் பூத்திருப்பதாக
கனவின் முதுகில் மகரந்தம் தூவுகிறது பட்டாம்பூச்சி

வர்ணங்களோடு நடுங்கும் என் விரல்களைப் பற்றிக்கொண்டு உயர்ந்தெழு
சுகந்தம் வீசும் உதடுகள் தேடு
ததும்பும் முத்தத்தின் மீதிறங்கி என்னை மிதக்க விடு

தக்கையாகிப் பிறழும் அசைவின் கணத்தில் உன் கரை ஒதுங்கும்
நொடிக் கொண்டு
அந் நிலத்தில் புதைத்து வை
வனமெங்கும் பரவும் துயரத்தில் நீ பற

*****

நன்றி : ' யாவரும். காம் ' இணைய இதழ் [ டிசம்பர் - 21 - 2013 ]

http://www.yaavarum.com/archives/1758

அடுக்குக் குலையும் நொடியிழை பிம்பம்..

*
காயங்கள் ஆறுவதற்கான கயிறு
தனிமைப் பிசிர் கொண்டு முறுக்குகின்றது குரல்கட்டை

சொற்கள் நொறுங்கும் உடைவை
கையேந்தித் தவறும்
கேவல் ஒலி

கண் பிதுக்கும் இறுதிக்காட்சி நொடியிழை பிடித்து
உறையத் தொடங்குகிறது அடுக்குக் குலையும் பிம்பமாக

வெளிவரும் நாக்கின் நீளத்தை
நுனியில் தொங்கும் கடைசி உச்சரிப்பை
கால் உதறலோடு உருளும் ஸ்டூலின் கால்கள்
மல்லாந்து திகைக்கின்றன

****

நன்றி : ' யாவரும். காம் ' இணைய இதழ் [ டிசம்பர் - 21 - 2013 ]

http://www.yaavarum.com/archives/1758

நிறமற்று உதிரும் உடல்களின் இறகு

*

நம்
இருவருக்கிடையில் ஒரு குறுகிய மௌனமிருந்தது
அதுவரை பேசிய உரையாடல்கள் அங்கு மிதக்கின்றன

அவற்றிலிருந்து வெளியேறும் பறவைகள் கூடு திரும்புவதில்லை என்றுமே
நிறமற்ற அதன் சிறகிலிருந்து உதிர்ந்த இரண்டொரு இறகுகளோடு
நாம் திரும்ப வேண்டியிருந்தது
தத்தம் உடல்களுக்கு

சாய்ந்த பொழுதின் துயரைப் பூசி
கூடுடைய பறவையின் திசையெங்கும் பரவத் தொடங்குகிறது
பொன்னந்தி நிறத்தில் உரையாடலின் இசை

ஊற்றுக்கண் பிளக்கும் ரகசியத்தின் முதல் துளியில்
உப்பெனப் பூக்கிறது பறத்தலின் மௌனச் சொல்

****

நன்றி : ' யாவரும். காம் ' இணைய இதழ் [ டிசம்பர் - 21 - 2013 ]

http://www.yaavarum.com/archives/1758

ஈரம் படரும் இருள் தடம்..

*
பிரார்த்தனையின் ஓசை முனகலாக ஒலிப்பதில்
சுற்றுச் சுவருக்கு மறுப்பேதுமில்லை

மேற்கூரையில் திரளும் பிசுபிசுப்பு
கடவுள் செவியில் படரும் ஈரம் என நம்புக

நடுங்கும் கூப்பிய விரல்களின் சத்தியங்கள் குளிர்வதை
அலையோடும் இமைக்குள் தவித்து உருளும் கண்களில்
பிறழும் காட்சியின் வர்ணங்கள் நனைவதை
மூத்தோர் விந்து உமட்டும் நாபி உள்முடிச்சில்
தாயின் மூச்சுக்காற்று திணறுவதையும்
சரணாகதி செய்ய

முனகலாகும் ஓசையில்

பிரார்த்தனையின் சுற்றுச் சுவரெங்கும்
இருண்ட கண்டத்தில் முளைத்த பிஞ்சு விரல்களின் தடங்கள்

*****

நன்றி : ' யாவரும். காம் ' இணைய இதழ் [ டிசம்பர் - 21 - 2013 ]

http://www.yaavarum.com/archives/1758

ஆதி டி.என்.ஏ -க்களின் பழைய உச்சரிப்பு

*
ஓர் அலைபேசியின் வழியே மிதந்து வரும் உன் குரலை
கைப்பற்றுகிறது என் புலனுணர்வு

நிற்காத பேரிரைச்சலின் கூர்ந்த கவனிப்புக்கு ஊடே
மொழியின் தளும்புதலில் நுரைக்கும் சொற்கள் செறிவுறும் அர்த்தச் சுவையின்
உப்புத்தன்மை பூசிய பதிலிகளோடு திருப்பி அனுப்பும் அலை
உன்னைத் தொடும் முன்பு
சாட்டிலைட் இழுத்துவிடும் பெருமூச்சாகிறது ஒலி அளவு

ஒரு சொல்லை இன்னொரு சொல் முந்துவதும் பின்னடைவதுமான
விளையாட்டாகி நகரும் வாக்கியங்களைக் கடக்கும் விண்கற்களில்
கல்வெட்டாகிப் புதைந்த ஆதிச் சொற்கள்
தன் சாயலொன்றை ஏற்றி அனுப்பிடும் சூக்குமங்களாக

அதிநவீனமாகிவிட்ட அலைஒலி ஈர்ப்புக் கருவியின் ஆன்ட்டனாக்கள்
உனக்கும் எனக்குமான உரையாடலை பின்நவீனப்படுத்தி நம்மிடம் கடத்துவதை
நம் பரஸ்பர குற்றச்சாட்டுகளுக்கான சாட்சியமாவதில்லை
எந்தவொரு உற்றுநோக்குதலோ
மூன்றாம் நபர் பஞ்சாயத்தோ

நேசிக்கிறேன் வெறுக்கிறேன் துயர் அழுத்தும் தனிமையில் புதைகிறேன்
இவைகளோடு அசையும் அறை ஜன்னலின் திரைச்சீலையில்
கொடிப்பிடித்து வளரும் மலர்கள் அறிந்திருக்கும்
யாவும்
ஒரு சொல்லின் மீதான வெயில் படரும் விளைவு மட்டுமல்ல
தலைமுறைகளை சுமந்து உழலும் ஆதி டி.என்.ஏ -க்களின்
பழைய உச்சரிப்பு
இந்த நிழலென்ற பைத்தியக் கணம்

*****

நன்றி : ' யாவரும். காம் ' இணைய இதழ் [ நவம்பர் - 20 - 2013 ]

http://www.yaavarum.com/archives/1622

உன் வசமிருக்கும் நிழல் துண்டை வெட்டி எடு..

*
ஒரு பிடிவாதத்தைக் கைவிடுவது என்பது முடியாத காரியம்
ஒரு மௌனத்தை விலை பேசுவதென்பது கடினமான காரியம்
ஒரு துயரத்தை பணயம் வைப்பது என்பது பந்தயம்
நீயாகிய இருப்பை இல்லாமல் செய்வது என்பது தற்கொலை

பேச்சுவார்த்தை நோக்கி விடுக்கும் அழைப்பை மறுதலித்து
ஒற்றை சூட்சுமத்தின் இலைத்துடிப்பு

அந்தரங்கத்தின் நிழல் பகுதியாகி முளைக்கும் விஷச் செடியில் பூக்கும்
கணங்களின் நறுமணத்தை சுவாசிக்கும் கரிசனம்
எனக்கு வாய்த்திருக்கிறது

வெயிலடித்துக் கொண்டிருக்கும் நம் சந்தையின் நடைபாதையில்
விலைபோகும் மௌனங்களின் துயரத்தை பேரம் பேச
உன் வசமிருக்கும் நிழல் துண்டை வெட்டி நடு
பணயமோ பிடிவாதமோ
கைவிடுதல் என்பது முடியாத காரியம்

தற்கொலைப் பற்றி இன்னொரு சந்தர்ப்பத்தில் பேசிக்கொள்வோம்
துணைக்கு இரண்டொரு ஆட்கள் சேரட்டும்

உபயோகமற்றுப் போன பழைய உரையாடல்களை
பரணிலிருந்து இறக்கி வைக்க யாரையாவது அனுப்பிவை
அது இப்போதைய உபரித் தேவை

நீயாகிய இருப்பை இல்லாமல் செய்வதென்பது முட்டாள்த்தனம்
பேரத்தைக் கவனி

*****

நன்றி : ' யாவரும். காம் ' இணைய இதழ் [ நவம்பர் - 20 - 2013 ]

http://www.yaavarum.com/archives/1622

துருப்பிடித்த நிறத்தில் வானின் பகல் ஒளி

*

சிறகுகள் நனைய அதன்
ஒடுங்கிய அடுக்குகளில் கருந்துளியாகி உருளும் மழைநீரோடு
பால்கனி கைப்பிடிக்கம்பியில்
துருப்பிடித்த நிறத்தில் நடுங்கி உட்கார்ந்திருந்த
காலை நேரக் காகத்தின் அலகில் மழைப் போர்த்திய
வானின் பகல் ஒளி

அசைவற்று நின்றுவிட்ட என் மங்கிய நிழலின்
விளிம்புத் தொட்டக் கணத்தில்

சிறகு உதறிப் பறந்தத் துடிப்பில்

நீர்ப்புள்ளிகள் பாதவிரல் மோதி உயரே தூக்குகிறது
மழைக்குள் தாவும்படி

*****

நன்றி : ' யாவரும். காம் ' இணைய இதழ் [ நவம்பர் - 20 - 2013 ]

http://www.yaavarum.com/archives/1622

உதிரத் திணறும் வர்ணப்பூச்சும் கைநிறைந்த க்ரேயான்களும்..

*
நழுவிடும் இமைகளுக்குக் கீழே
எரிந்து பொசுங்கும் டயர் வாசனையோடு
தேய்ந்து நிற்கிற இரவு

அதிர்ச்சி பெருகும் இருள் மீது படர்ந்தபடி
ஓலமிட மறந்துபோன
குருட்டு நினைவுகளின் புதிய ஜன்னல்கள் உடைகின்றன

கை உயர்த்தி அபயக் குரல் எழுப்பும் சொல் ஒன்றின் வடிவம்
வெளிவரத்துடிக்கும் அர்த்தங்களின் அடைப்புக்குறிகளை
நெளியச் செய்கின்றது

ஏற்றப்படும் அவசரக்காலக் கொடிக்கம்பத்தின் சுற்றுப் பீடத்தில்
நெருக்கிப்பிடித்து நிற்கும் மௌனத் தலைக்குள்
ஓயாமல் சுழலத் தொடங்குகிறது சீரற்ற ஓசையோடு
நிதானம் தப்பாத ஒரு மின்விசிறி

அறைப் புழுக்கம் தவிக்கச் செய்யும் கனவின் சுவரெங்கும்
உதிரத் திணறும் வர்ணப் பூச்சில் பஸ் ஒன்று எரியும் ஓவியத்தை
முனைமழுங்கிய பென்சில் கொண்டு கிறுக்கிய
நண்பனின் மகள் ஒருத்தி
கை நிறைய க்ரேயான்களோடு கதவுத் தட்டும் கணத்தில்
அடங்கிப் போயிற்று
மின்விசிறியின் கர்ரக் சத்தம்

*****

நன்றி : ' யாவரும். காம் ' இணைய இதழ் [ நவம்பர் - 20 -2013 ]

http://www.yaavarum.com/archives/1622