பிரி இழையில் சுருளும் வதை..

*
மறுக்கின்றாய்
மறுப்பவைகளின் மீது நிகழ்கிறது
உன் சொல்லின் நடனம்

மறுப்பின் கோப்பை நிரம்பி வழிகிறது
இருவருக்குமிடையே நீண்டு நகரும்
மேஜையின் அகலத்தில்

மறுத்தலின் மொழியை பிழையுடன்
எழுதப் பழகுகிறாய் எந்நேரமும்
எந்த நொடியும்

உயிர் திருகும் மறுப்பில்
பிரி இழையில் சுருள்கிறது வதை

நிழல் படரும் வெயில் நதியில்
இழுத்து போகிறது என்னை
உனது மறுதலிப்பு

நீர் கீழிறங்கும் செங்குத்துப் பாறையென
செதுக்கி நிற்கிறது உனதந்த
மறுதலிப்பின் சிறகு

*****

நன்றி : ( உயிரோசை / உயிர்மை. காம் ) [ செப்டம்பர் - 17 - 2012 ]
 
http://www.uyirmmai.com/ContentDetails.aspx?cid=5941