உடைபடும் கிளிஞ்சல்களும்.. ஒரு மணல் மேடும்..

*

ஒவ்வொரு முறையும்
வீசித் தெறிக்கும் கடல் அலையின்
துளிகளை
முத்தமிட்டு வெட்கப்படுத்துகிறது
அந்தி சூரியன்..

காத்திருந்து
குவித்து வைத்த மணல் மேட்டில்
உடைந்த கிளிஞ்சல்களின்
உள்ளடுக்கில்
வரி வரியாய் விரிந்து கிடக்கிறது
வெளிர் வானம்..

' இன்னும் பத்து நிமிடத்தில் ' - வந்து விடுவதாக
பத்து நிமிடத்துக்கொருமுறை
வந்து கொண்டிருக்கும்
எஸ்.எம்.எஸ்ஸில் -

அந்தி சூரியனும்
வெளிர் வானும் தூர்ந்து போகின்றன..

கூடவே துணைக்கு
உடைப்பட்ட கிளிஞ்சல்களும்..

****

நன்றி : ' விகடன்.காம் ' ( ஜனவரி 28 - 2010 )

http://youthful.vikatan.com/youth/NYouth/elangopoem270110.asp

மாதிரிகள் அற்ற வரைப்படங்கள்..

*

முன்னெப்போதும்
சொல்லிவிடத் தயக்கங்கள்
சுமந்த பருவம் தொட்டே..
ஈடேறி விடுகிறது
வயதுக்குரிய ரகசியம்..

ஊமைச் செதில்களில்..
அடர்ந்தும் குறுகியும்
சேகரமாகின்றன

கால நுனி
பதம் பார்க்கும்..
முன் சுவடுகள்..

மாதிரிகள் அற்ற
வரைப்படங்களோடு..
இருள் அடர்ந்த
மனதின் வனத்துக்குள்..

பயணிக்கும்படி
நிர்பந்திக்கிறது

முடிச்சிட்டுக் கொள்ளும்
புதிர் பாதை..!

****

நன்றி : ' விகடன்.காம் ' ( டிசம்பர் 30-2009 )

http://youthful.vikatan.com/youth/NYouth/elangopoem30122009.asp

இருவேறு தருணங்கள்..

*

உன்
வாழ்வின்
ஒற்றையடிப் பாதை நெடுக
இரு கரைகளிலும்
சின்ன சின்னப் பூக்களாய் பூத்திருக்கிறேன்

என்னைப் பறிக்க மறுதலித்து
நடந்து கொண்டே இருக்கிறாய்

விரல்களில்
பதற்ற நூலொன்றைத் திருகியபடி !

*

வேறொரு தருணத்தில்...
மேகத்திலிருந்து புறப்பட்டு
மழையென உன் மீது பொழிந்துவிட
முயன்றேன்

நீயோ
குடையோடு எதிர்கொண்டு
ஊடுருவி நடக்கத் தொடங்குகிறாய்

கொஞ்சமும்
பதற்றமின்றி !

****

நன்றி : ' விகடன். காம் ' ( டிசம்பர் 2009 )

http://youthful.vikatan.com/youth/NYouth/elangopoem14122009.asp