திணறும் குளிர் இரவின் தனிமை..

*
தனித்த தீவின்
ரகசிய குகைக்குள் திரிவதாய்
சங்கேத குறியீடுகளை
மெயில் பண்ணியிருந்தாய்

கோடுகள் ஏறி இறங்கும்
ஒரு கை சித்திரத்தையும் இணைத்திருந்தாய்

திணறும் குளிர் இரவின்
தனிமைகள்
என்னை அலைக்கழிக்கின்றன

உலகின் குகைகள் பற்றின
மொத்த டவுன்லோடும் இந்த
மேஜை முழுதும் நிறைந்து பிதுங்குகிறது..

சென்ற வாரம்
நெஞ்சு கனத்து வலி குத்தி வியர்த்து
நினைவு தப்பி
ஐ.ஸி.யூ குளிரில் மல்லாந்து கிடந்தாய்..

உன் மகள் என்னிடம்
தந்த
உன் ஈ.ஸி.ஜி ரிப்போர்ட்டில்
ஏறி இறங்கிய கோடுகளில் நெளிந்தது
அந்த ரகசிய குகை..

******

நன்றி : ( உயிரோசை / உயிர்மை.காம் ) [ ஏப்ரல் - 18 - 2011 ] 


http://www.uyirmmai.com/ContentDetails.aspx?cid=4201