சதுரத்துக்குள் நெருக்கியடுக்கப்பட்ட வட்டங்கள்..

*
வேறொரு
சதுரத்துக்குள்
நெருக்கியடுக்கப்பட்ட வட்டங்களெனத் தான்
வரைந்து வைத்திருக்கிறேன்

நமக்குள்
நிகழ்ந்த கடைசி உரையாடலுக்குப் பின்..

அந்த இரவில்
உடைந்த
முக்கோணங்களை..

****

தயக்கங்கள்..

*
ஒப்பந்தங்கள்
கையெழுத்தாகிவிட்டன
பிறகென்ன..

ஒரு
குளிர்பானத்தோடு
கை குலுக்கிப் பிரிவதில்..

தயக்கங்கள் இருப்பதாக
மீண்டும்
ஏன் தொடங்குகிறாய்

ஒரு
அபத்தத்தை..

****

எங்கிருந்து தொடங்குவது என்பதை..

*
சரி
ஒரு முடிவுக்கு வந்துவிடலாம்

ஆனால்..

மீண்டும்
எங்கிருந்து தொடங்குவது
என்பதை
மீண்டுமொருமுறை கேட்காதே

நொறுங்கி கிடக்கிறது
நம் உரையாடல்..

****

அரிதாரம்..

*
உன்
அமைதியின் அரிதாரம்
கலைத்துவிட மறுக்கிறது

நடந்து முடிந்த
நாடகத்தின்
அபத்த காட்சியொன்றை..!

****

கடக்க முடியா சுவர்..

*
கடக்க முடியா சுவரென
பெருங் கனவொன்று
குறுக்கே நின்றது..

அதை
இடித்துத் தகர்க்க
உன்னிடம்
ஒரு கடப்பாரைக் கேட்டேன்

நீ
இதுவரை
பார்த்து பார்த்து
வார்த்து வைத்திருந்த
உன் சேமிப்புக் கிடங்கிலிருந்து..

ஒரு
வசவு வார்த்தையை
உருவித் தந்தாய்...

எல்லாம் உடைந்தது..!

****

உனக்கான வரைப்படம்..

*
இந்த உலகின்
இந்த நகரின்
இந்த வாழ்வின்

யாதொரு பயங்கரங்களோ
கட்டவிழும் துயரங்களோ

எல்லாவற்றையும்
கொஞ்சம் ஏற்றுக் கொள்கிறாய்
கொஞ்சம் நிராகரித்துவிடுகிறாய்

உன் மெல்லிய
தொடர் மூச்சு சப்தத்தில்
இசைவோடு சுழல்வது
இந்த
அறையின்
மின்விசிறி மட்டுமே..!

தூங்கு..

தூங்கும்போது தானே..
உனக்கான
வரைப்படத்தை நீ வரைவதாக
இந்த
விஞ்ஞானம் சொல்லுகிறது..

எனவே தூங்கு..

கை நிறைய கவிதைகளோடு
நான் காத்திருக்கிறேன்..!

****

காத்திருக்கின்றன பொம்மைகள்..

*
தூக்கத்தில்
நீ
உதிர்க்கும் புன்னகைக்குள்
நுழைந்து கொள்ள

காத்திருக்கின்றன பொம்மைகள்..

சீக்கிரம்
வளர்ந்து விடு மகளே..

****

மெட்ரோ கவிதைகள் - 80

*
ஜன்னலோரம்
காற்றைக் கிழித்து எதிரில் கடக்கும்
மெட்ரோ ரயிலின்
ஹாரன் சப்தத்தில்..

நீ
அனுப்பிய
காதல் மெஸேஜ்
உடைந்து கிடக்கிறது

இந்த
கம்பார்ட்மென்ட்டில்..!

****

துயர் இரவின் புறவழிக் கதவு..

*
எங்கிருந்தெல்லாமோ
வந்து கொண்டிருக்கிறார்கள் தூதுவர்கள்..
என்
வறண்ட பகல்களின்
கதவுகளைத் திறந்தபடி..

இறுக்கிக் குலுக்கும் கரங்கள் வழியே
அழுந்தச் செய்கிறார்கள் துயரங்களை..

பின்
ஆறுதல்களைப் பரிசளித்துவிட்டு

வர்ணக் காகிதங்களென
வயதை வெட்டித் தருகிறார்கள்..

இனி
புதுப்பொலிவோடு இருக்கும்படி
பரிந்துரைக்கும் தூதுவர்கள்

என்
இரவின் புறவழிக் கதவைத் துளைத்து
வெளியேறுகிறார்கள்..

பிறகு
நட்சத்திரங்கள்
ஒவ்வொன்றாக அணைகின்றன..

****

அப்படியொன்று நடந்துவிட்டதற்கான..

*
துயரச் சாலைகளைக்
கடக்கும்போதெல்லாம்

இடறுகிறது..

அப்படியொன்று
நடந்துவிட்டதற்கான

சந்தர்ப்ப
கல்..!

****