இறுதியாக அது நிகழ்கிறது..

* 
இறுதியாக அது நிகழ்கிறது

நம்பிக்கையோடு
தொடங்கிய பயணத்துள்
கட்டுடைந்து போன உறவின்
நெருக்கடி விரிசல்

தன்னிச்சையாக முளைவிடும்
வார்த்தைகளின்
அர்த்தப் பிழை

பறப்பதற்கென வளர்ந்த சிறகின்
இறகுகள்
ஏகாந்தத்தில் உதிரும் தருணம்

உதடுகளில் இறுகிய
ஒரு மௌனத்தின் வழியே
கசிந்து பெருகும் அமைதியின்மை

காதல் கணத்தின்
சுவை ஊற்றெடுக்கும் போதே
அதனுள் குமிழ் விட்ட
கசப்பின் ஒரு சொட்டு

இறுதியாகத் தான் நிகழ்கிறது
அது

புறந்திரும்புதல்
விட்டு விலகுதல்
அல்லது
ஒரு
தற்கொலை

*****

நன்றி : ( உயிரோசை / உயிர்மை.காம் ) [ செப்டம்பர் - 5 - 2011 ] 


http://www.uyirmmai.com/ContentDetails.aspx?cid=4738