*
ஒரு முறையாவது சொல்லியிருக்கலாம்
கை மறதியாக உன் மேஜை மீது வைத்துவிட்ட
கோரிக்கையின் நகலை
என்ன செய்ய உத்தேசித்திருந்தாய் என்பதை
மன்றாடியோ
மண்டியிட்டோ அல்ல
கைகட்டிப் பெற்றுக் கொண்ட கூலி
வெண்ணிற கவரில் அடைத்துத் தந்தாய்
மணம் கமழும்
புத்தம்புதிய பணக் காகிதங்களின்
வர்ணங்களில்
நவீன டிராக்டர்கள் உழுகின்றன
பொருளாதாரத்தின் நிலத்தை
ரிசர்வ் வங்கி கவர்னரின் வாக்குறுதியோடு
வீடு திரும்பும் வழியில்
செல்போன் சிணுக்கி
அதிர்வலையோடு மீண்டுமழைக்கிறாய்
உன்
பிரத்தியேகக் குளிரூட்டப்பட்ட கேபினுள்
போனஸாக நீயடுக்கிய
எக்ஸ்ட்ரா வேலைகளின் சுமையோடு
லிப்டிலிருந்து வெளிப்பட்ட கணத்தில்
உணர முடிந்தது
வாய் பிளந்து ஒரு மிருகம்
என்னை வெளியே துப்புவதையும்
உறுமும் டிராக்டர் என
உன்
கண்ணாடிக் கட்டிடமும்..
****
நன்றி : ( உயிரோசை / உயிர்மை.காம் ) [ செப்டம்பர் - 2010 ]
http://www.uyirmmai.com/ContentDetails.aspx?cid=3380
கருத்துகள் இல்லை:
கருத்துரையிடுக